श्री ब्रह्माण्ड पावन कृष्ण कवच
विनियोग:
ॐ अस्य श्री ब्रह्माण्डपावन कवचस्य साक्षात् श्रीहरिः ऋषिः
गायत्रीछन्दः स एव जगदीश्वरः श्रीकृष्णो देवता
(धर्म अर्थ काम) धर्मार्थ काम मोक्षेषु जपे विनियोगः ||
|| ब्रह्मोवाच ||
राधाकान्त महाभाग कवचं यत् प्रकाशितम् |
ब्रह्माणडपावनं नाम कृपया कथय प्रभो ||
मां महेशं च धर्मं च भक्तं च भक्तवत्सल |
त्वत्प्रसादेन पुत्रेभ्यो दास्यामि भक्तिसंयुतः ||
|| श्री कृष्ण उवाच ||
शृणु वक्ष्यामि ब्रह्मेश धर्मेदं कवचं परम् |
अहं दास्यामि युष्मभ्यं गोपनीयं सुदुर्लभम् ||
यस्मै कस्मै न दातव्यं प्राणतुल्यं ममैव हि |
यत्तेजो मम देहेऽस्ति तत्तेजः कवचेऽपि च ||
कुरु सृष्टिमिमं धृत्वा धाता त्रिजगतां भव |
संहर्त्ता भव हे शम्भो मम तुल्यो भवे भव ||
हे धर्म त्वमिमं धृत्वा भव साक्षी च कर्मणाम् |
तपसां फलदाता च यूयं भवत मद्वरात् ||
ब्रह्माण्डपावनस्यास्य कवचस्य हरिः स्वयम् |
ऋषिश्छन्दश्च गायत्री देवोऽहं जगदीश्वर: ||
धर्मार्थकाममोक्षेषु विनियोगः प्रकीर्तितः |
त्रिलक्षवारपठनात् सिद्धिदं कवचं विधे ||
यो भवेत् सिद्धकवचो मम तुल्यो भवेत्तु सः |
तेजसा सिद्धियोगेन ज्ञानेन विक्रमेण च ||
प्रणवो मे शिरः पातु नमो रासेश्वराय च |
भालं पायान्नेत्रयुग्मं नमो राधेश्वराय च ||
कृष्णः पायाच्छोत्रयुग्मं हे हरे घ्राणमेव च |
जिह्विकां वह्निजाया तु कृष्णायेति च सर्वतः ||
श्रीकृष्णाय स्वाहेति च कण्ठं पातु षडक्षरः |
ह्रीं कृष्णाय नमो वक्त्रं क्लीं पूर्वश्च भुजद्वयम् ||
नमो गोपाङ्ग नेशाय स्कन्धावष्टाक्षरोऽवतु |
दन्तपंक्तिमोष्ठयुग्मं नमो गोपीश्वराय च ||
ॐ नमो भगवते रासमण्डलेशाय स्वाहा |
स्वयं वक्षःस्थलं पातु मन्त्रोऽयं षोडशाक्षर: ||
ऐं कृष्णाय स्वाहेति च कर्णयुग्मं सदाऽवतु |
ॐ विष्णवे स्वाहेति च कंकालं सर्वतोऽवतु ||
ॐ हरये नम इति पृष्ठं पादं सदाऽवतु |
ॐ गोवर्द्धनधारिणे स्वाहा सर्वशरीरकम् ||
प्राच्यां मां पातु श्रीकृष्ण आग्नेय्यां पातु माधवः |
दक्षिणे पातु गोपीशो नैरृत्यां नन्दनन्दनः ||
वारुण्यां पातु गोविन्दो वायव्यां राधिकेश्वरः |
उत्तरे पातु रासेश ऐशान्यामच्युतः स्वयम् ||
सन्ततं सर्वतः पातु परो नारायणः स्वयम् |
इति ते कथितं ब्रह्मन् कवचं परमाद्भुतम् ||
मम जीवनतुल्यं च युष्मभ्यं दत्तमेव च |
अश्वमेधसहस्राणि वाजपेयशतानि च |
कलां नार्हन्ति तान्येव कवचस्यैव धारणात् ||
गुरुमभ्यर्च्य विधिवद्वस्त्रालंकारवन्दनै (चन्दनैः)|
स्त्रात्वा तं च नमस्कृत्य कवचं धारयेत् सुधी: ||
कवचस्य प्रसादेन जीवनमुक्तोभवेन्नरः |
यदि स्यात् सिद्धकवचो विष्णुरेव भवेद् द्विज ||