अपामार्जन विधान
 |
अपामार्जन विधान |
श्री अग्निनारायणरुवाच
ॐ नमःपरमार्थाय पुरुषाय महात्मने |
अरूपबहुरूपाय व्यापिने परमात्मने ||
निष्कल्मषाय शुद्धाय ध्यानयोगरताय च |
नमस्कृत्य प्रवक्ष्यामि यत् तत् सिध्यतु में वचः ||
वराहाय नृसिंहाय वामनाय महात्मने |
नमस्कृत्य प्रवक्ष्यामि यत् तत् सिध्यतु में वचः ||
त्रिविक्रमाय रामाय वैकुण्ठाय नराय च |
नमस्कृत्य प्रवक्ष्यामि यत् तत् सिध्यतु में वचः ||
वराह नरसिंहेश वामनेश त्रिविक्रम |
हयग्रीवेश सर्वेश हृ हृषीकेश हराशुभम्
अपराजित चक्राद्यैश्चतुर्भिः परमायुधैः |
अखण्डितानुभावैस्त्वं सर्वदुष्टहरो भव ||
हरामुकस्य दुरितं सर्वं च कुशलं कुरु |
मृत्युबन्धार्तिभयदं दुरिष्टस्य च यत्फलम् ||
पराभिध्यानसहितैः प्रयुक्तं चाभिचारिकम् |
गरस्पर्शमहारोगप्रयोगं जरया जर ||
ॐ नमो वासुदेवाय नमः कृष्णाय खड्गिने |
नमः पुष्करनेत्राय केशवायादिचक्रिणे ||
नमः कमलकिञ्जल्कपीतनिर्मलवाससे |
महाहयरिपुस्कन्धधृष्टचक्राय चक्रिणे ||
दंष्ट्रोद्धृतक्षितिभृते त्रयीमूर्तिमते नमः |
महायज्ञवराहाय शेषभागाङ्कशायिने ||
तप्तहाटककेशान्तज्वलत्पावकलोचन |
वज्राधिकनखस्पर्श दिव्यसिंह नमोऽस्तु ते ||
काश्यपायातिह्रस्वाय ऋग्यजुः सामभूषिणे |
तुभ्यं वामनरुपायाक्रमते गां नमो नमः ||
वराहाशेषदुष्टानि सर्वपापफलानि वै |
मर्द मर्द महादंष्ट्र मर्द मर्द च तत्फलम् ||
नारसिंह करालास्य दन्तप्रान्तानलाज्ज्वल |
भञ्ज भञ्ज निनादेन दुष्टान् पश्यार्तिनाशन ||
ऋग्यजुःसामगर्भाभिर्वाग्भिर्वामनरुपधृक् |
प्रशमं सर्वदुःखानि नयत्वस्य जनार्दन ||
ऐकाहिकं द्व्याहिकं च तथा त्रिदिवसं ज्वरम् |
चातुर्थिकं तथात्युग्रं तथैव सततं ज्वरम् ||
दोषोत्थं संनिपातात्थं तथैवागन्तुकं ज्वरम् |
शमं नयाशु गोविन्द च्छिन्धि च्छिन्ध्यस्य वेदनाम् ||
नेत्रदुःखं शिरोदुःखं दुःखं चोदरसम्भवम् |
अनिश्वासमतिश्वासं परितापं सवेपथुम् ||
गुदघ्राणाङ्घ्रिरोगांश्च कुष्ठरोगांस्तथा क्षयम् |
कामलादींस्तथा रोगान् प्रमेहांश्चातिदारुणान् ||
भगन्दरातिसारांश्च मुखरोगांश्च वल्गुलिम् |
अश्मरीं मूत्रकृच्छ्रांश्च रोगानन्यांश्च दारुणान् ||
ये वातप्रभवा रोगा ये च पित्तसमुद्भवाः |
कफोद्भवाश्च ये केचिद् ये चान्ये सांनिपातिकाः ||
आगन्तुकाश्च ये रोगा लूताविस्फोटकादयः |
ते सर्वे प्रशमं यान्तु वासुदेवस्य कीर्तनत् ||
विलयं यान्तु ते सर्वे विष्णोरुच्चारणेन च |
क्षयं गच्छन्तु चाशेषास्ते चक्राभिहता हरेः ||
अच्युतानन्तगोविन्दनामोच्चारणभेषजात् |
नश्यन्ति सकला रोगाः सत्यं सत्यं वदाम्यहम् ||
स्थावरं जङ्गमं वापि कृत्रिमं चापि यद्विषम् |
दन्तोद्भवं नखभवमाकाशप्रभवं विषम् || २७ ||
लूतादिप्रभवं यच्च विषमन्यत्तु दुःखदम् |
शमं नयतु तत्सर्वं वासुदेवस्य कीर्तनम् ||
ग्रहान् प्रेतग्रहांश्चापि तथा वै डाकिनीग्रहान् |
वेतालांश्च पिशाचांश्च गन्धर्वान् यक्षराक्षसान् ||
शकुनीपूतनाद्यांश्च तथा वैनायकान् ग्रहान् |
मुखमण्डीं तथा क्रूरां रेवतीं वृद्धरेवतीम् ||
वृद्धिकाख्यान्ग्रहाश्चोग्रांस्तथा मातृग्रहानपि |
बालस्य विष्णोश्चरितं हन्तु बालग्रहानिमान् ||
वृद्धाश्च ये ग्रहाः केचिद् ये च बालग्रहाः क्वचित् |
नरसिंहस्य ते दृष्ट्या दग्धा ये चापि यौवने ||
सटाकरालवदनो नारसिंहो महाबलः |
ग्रहानशेषान्निःशेषान् करोतु जगतो हितः ||
नरसिंह महासिंह ज्वालामालोज्ज्वलानन |
ग्रहानशेषान् सर्वेश खाद खादाग्निलोचन ||
ये रोगा ये महोत्पाता यद्विषं ये महाग्रहाः |
यानि च क्रूरभूतानि ग्रहपीडाश्च दारुणाः ||
शस्त्रक्षतेषु ये दोषा ज्वालागर्दभकादयः |
तानि सर्वाणि सर्वात्मा परमात्मा जनार्दनः ||
किंचिद्रूपं समास्थाय वासुदेवास्य नाशय |
क्षिप्त्वा सुदर्शनं चक्रं ज्वालामालातिभीषणम् ||
सर्वदुष्टोपशमनं कुरु देववराच्युत |
सुदर्शन महाज्वाला च्छिन्धि च्छिन्धि महारव ||
सर्वदुष्टानि रक्षांसि क्षयं यान्तु विभीषण |
प्राच्यां प्रतीच्यां च दिशि दक्षिणोत्तरतस्तथा ||
रक्षां करोतु सर्वात्मा नरसिंहः स्वगर्जितैः |
दिवि भुव्यन्तरिक्षे च पृष्ठतः पार्श्वतोऽग्रतः ||
रक्षां करोतु भगवान् बहुरुपी जनार्दनः |
यथा विष्णुर्जगत्सर्वं सदेवासुरमानुषम् ||
तेन सत्येन दुष्टानि शममस्य व्रजन्तु वै |
यथा विष्णौ स्मृते सद्यः संक्षयं यान्ति पातकाः ||
सत्येन तेन सकलं दुष्टमस्य प्रशाम्यतु |
यथा यज्ञेश्वरो विष्णुर्देवेष्वपि हि गीयते ||
सत्येन तेन सकलं यन्मयोक्तं तथास्तु तत् |
शान्तिरस्तु शिवं चास्तु दुष्टमस्य प्रशाम्यतु ||
वासुदेवशरीरोत्थैः कुशैर्निर्णाशितं मया |
अपमार्जति गोविन्दो नरो नारायणस्तथा ||
तथास्तु सर्वदुःखानां प्रशमो वचनाद्धरेः |
अपामार्जनकं शस्तं सर्वरोगादिवारणम् ||
अहं हरिः कुशा विष्णुर्हता रागा मया तव ||
|| अस्तु ||
Iska arth mil sakta hai?
ReplyDelete