श्री गोपाल अष्टोत्तर शतनाम स्तोत्रम्
 |
| श्री गोपाल अष्टोत्तर शतनाम स्तोत्रम् |
|| ध्यान ||
कस्तुरीतिलकं लालाटपटले वक्षःस्थले कौस्तुभं
नासाग्रे वरमौक्तिकं करतले वेणुः करे कङ्कणंम् |
सर्वाङ्गे हरिचन्दनं सुललितं कण्ठे च मुक्तावली
गोपस्त्रीपरिवेष्टतो विजयते गोपालचूडामणिः ||
|| विनियोगः ||
ॐ अस्य श्रीगोपाल शतनाम स्तोत्रस्य नारद ऋषिः अनुष्टुप् छन्दः
श्री गोपालः परमात्मा देवता श्री गोपालप्रीत्यर्थे शतनामपाठे विनियोगः |
|| स्तोत्र ||
गोपालो गोपतिर्गोप्ता गोविन्दो गोकुलप्रियः |
गम्भीरो गगनो गोपीप्राणभृत् प्राणधारकः || १ ||
पतितानन्दनो नन्दी नन्दीशः कंससूदनः |
नारायणो नरत्राता नरकार्णवतारकः || २ ||
नवनीतप्रियो नेता नवीनघनसुन्दरः |
नवबालकवात्सल्यो ललितानन्दतत्परः || ३ ||
पुरुषार्थप्रदः प्रेमप्रवीणः परमाकृतिः |
करुणः करुणानाथः कैवल्यसुखदायकः || ४ ||
कदम्बकुसुमावेशी कदम्बवनमन्दिरः |
कादम्बीविमदामोदघूर्णलोचनपङ्कजः || ५ ||
कामी कान्तकलानन्दी कान्तः कामनिधिः कविः |
कौमोदकीगदापाणिः कवीन्द्रो गतिमान्हरः || ६ ||
कमलेशः कलानाथः कैवल्यः सुखसागरः |
केशवः केशिहा केशः कलिकल्मषनाशनः || ७ ||
कृपालुः करुणासेवी कृपोन्मीलितलोचनः |
स्वच्छन्दः सुन्दरः सुन्दः सुरवृन्दनिषेवितः || ८ ||
सर्वज्ञः सर्वदो दाता सर्वपापविनाशनः |
सर्वाह्लादकरः सर्वः सर्ववेदविदां प्रभुः || ९ ||
वेदान्तवेद्यो वेदात्मा वेदप्राणकरो विभुः |
विश्वात्मा विश्वविद्विश्वप्राणदो विश्ववन्दितः || १० ||
विश्वेशः शमनस्त्राता विश्वेश्वरः सुखप्रदः |
विश्वदो विश्वहारी च पूरकः करुणानिधिः || ११ ||
धनेशो धनदो धन्वी धीरो धीरजनप्रियः |
धरासुखप्रदो धाता दुर्धरान्तकरो धरः || १२ ||
रमानाथो रमानन्दो रसज्ञो हृदयास्पदः |
रसिको रसीदो रासी रासानन्दकरो रसः || १३ ||
राधिकाराधितो राधाप्राणेशः प्रेमसागरः |
नाम्नां शतं समासेन तव स्नेहात्प्रकाशितम् || १४ ||
अप्रकाश्यमिमं मन्त्रं गोपनीयं प्रयत्नतः |
यस्य तस्यैकपठनात्सर्वविद्यानिधिर्भवेत् || १५ ||
पूजयित्वा दयानाथं ततः स्तोत्रमुदीरयेत् |
पठनाद्देवदेवेशि भोगमुक्तफलं लभेत् || १६ ||
सर्वपापविनिर्मुक्तः सर्वदेवाधिपो भवेत् |
जपलक्षेण सिद्धं स्यात्सत्यं सत्यं न संशयः |
किमुक्तेनैव बहुना विष्णुतुल्यो भवेन्नरः || १७ ||
|| इति श्री हरगौरीसंवादे श्री गोपाल शतनाम स्तोत्रं सम्पूर्णम् ||
Tags:
108 Naam