पशिपति स्तोत्र
 |
| पशुपति स्तोत्र |
स पातु वो यस्य जटाकलापे
स्थितः शशाङ्कः स्फुटहारगौरः |
नीलोत्पलानामिव नालपुञ्जे
निद्रायमाणः शरदीव हंसः || १ ||
जगत्सिसृक्षाप्रलयक्रियाविधौ
प्रयत्नमुन्मेषनिमेषविभ्रमम् |
वदन्ति यस्येक्षण लोलपक्ष्मणां
पराय तस्मै परमेष्ठिने नमः || २ ||
व्योम्नीव नीरदभरः सरसीव वीचि
व्यूहः सहस्त्रमहसीव सुधांशुधाम |
यस्मिन्निदं जगदुदेति च लीयते च
तच्छाम्भवं भवतु वैभवमृद्धये वः || ३ ||
यः कन्दुकैरिव पुरन्दरपद्मसद्म
पद्मापतिप्रभृतिभिः प्रभुरप्रमेयः |
खेलत्यलङ्घयमहिमा स हिमाद्रिकन्या
कान्तः कृतान्तदलनो गलयत्वंघं वः || ४ ||
दिश्यात् स शीतकिरणाभरणःशिवं वो
यस्योत्तमाङ्गभुवि विस्फुरदुर्मिपक्षा |
हंसीव निर्मलशशाङ्ककलामृणाल
कन्दार्थिनी सुरसरिन्नभतः पपात || ५ ||
|| इति पशुपति स्तोत्रम् सम्पूर्णम् ||
Tags:
Stotra