विष्णुस्तवनम्
 |
| विष्णुस्तवनम् |
श्वेत उवाच
ॐ नमो वासुदेवाय नमः संकर्षणाय च |
प्रद्युम्नायानिरुद्धाय नमो नारायणाय च ||
नमोऽस्तु बहुरूपाय विश्वरूपाय वेधसे |
निर्गुणाय अप्रतर्क्याय शुचये शुक्लकर्मणे ||
ॐ नमः पद्मनाभाय पद्मगर्भोद्भवाय च |
नमोऽस्तु पद्मवर्णाय पद्महस्ताय ते नमः ||
ॐ नमः पुष्कराक्षाय सहस्त्राक्षाय मीढुषे |
नमः सहस्रपादाय सहस्त्रभुजमन्यवे ||
ॐ नमोऽस्तु वराहाय वरदाय सुमेधसे |
वरिष्ठाय वरेण्याय हिरण्याय अच्युताय च ||
ॐ नमो बालरूपाय बालपद्म प्रभाय च |
बालार्कसोमनेत्राय मुञ्चकेशाय धीमते ||
केशवाय नमो नित्यं नमो नारायणाय च |
माधवाय वरिष्ठाय गोविन्दाय नमो नमः ||
ॐ नमो विष्णवे नित्यं देवाय वसुरेतसे |
मधुसूदनाय नमः शुद्धायांशुधराय च ||
नमोऽनन्ताय सूक्ष्माय नमः श्रीवत्सधारिणे |
त्रिविक्रमाय च नमो दिव्यपीताम्बराय च ||
सृष्टिकर्त्रे नमस्तुभ्यं गोप्त्रे धात्रे नमो नमः |
नमोऽस्तु गुणभूताय निर्गुणाय नमो नमः ||
नमो वामनरूपाय नमो वामनकर्मणे |
नमो वामननेत्राय नमो वामनवाहिने ||
नमोऽनन्ताय पूज्याय नमोऽस्त्वव्यक्तरूपिणे |
अप्रतर्क्याय शुद्धाय नमो भयहराय च ||
संसारार्णव पोताय प्रशान्ताय स्वरूपिणे |
शिवाय सौम्यरूपाय घोररूपधराय च ||
भवभंगकृते चैव भवभोगप्रदाय च |
भवसंघातरूपाय भवसृष्टिकृते नमः ||
ॐ नमो दिव्यरूपाय सोमाग्निश्वसिताय च |
सोमसूर्यांशु केशाय गोब्राह्मणहिताय च ||
ॐ नमः रूक्स्वरूपाय पदक्रम स्वरूपिणे |
ऋक् स्तुताय नमस्तुभ्यं नमो ऋक् साधनाय च ||
ॐ नमो यजुषां धात्रे यजू रूपधराय च |
यजुर्याज्याय जुष्टाय यजुषां पतये नमः ||
ॐ नमः श्रीमते देव श्रीधराय वराय च |
श्रियः कान्ताय दान्ताय योगचिन्त्याय योगिने ||
ॐ नमः सामरूपाय सामध्वनिवराय च |
ॐ नमः सामसौम्याय सामयोगविदे नमः ||
साम्ने च सामगीताय ॐ नमः सामधारिणे |
सामयज्ञविदे चैव नमः सामकराय च ||
नमः त्वथर्वशिरसे नमोऽथर्व स्वरूपिणे |
नमोऽस्त्वथर्व पादाय नमोऽथर्वकराय च ||
ॐ नमो वज्रशीर्षाय मघुकैटभघातिने |
महोदधि जलस्थाय वेदाहरणकारिणे ||
नमो दीप्तस्वरूपाय हृषीकेशाय वै नमः |
नमो भगवते तुभ्यं वासुदेवाय ते नमः ||
नारायण नमस्तुभ्यं नमो लोकहिताय च |
ॐ नमो मोहनाशाय भवभंगकराय च ||
गतिप्रदाय च नमो नमो बन्धहराय च |
त्रैलोक्यतेजसां कर्त्रे नमस्तेजः स्वरूपिणे ||
योगीश्वराय शुद्धाय रामायोत्तरणाय च |
सुखाय सुखनेत्राय नमः सुकृतधारिणे ||
वासुदेवाय वन्द्याय वामदेवाय वै नमः |
देहिनां देहकर्त्रे च भेदभंगकराय च ||
देवैः वंदितदेहाय नमस्ते दिव्यमौलिने |
नमो वासनिवासाय वास व्यवहराय च ||
ॐ नमो वसुकर्त्रे वसुवासप्रदाय च |
नमो यज्ञस्वरूपाय यज्ञेशाय च योगिने ||
यतियोगकरेशाय नमो यज्ञाङ्गधारिणे |
संकर्षणाय च नमः प्रलम्बमथनाय च ||
मेघघोष स्वनोत्तीर्ण वेगलांगल धारिणे |
नमोऽस्तु ज्ञानिनां ज्ञान नारायणपरायण ||
न मेऽस्ति त्वामृते बन्धुः नरकोत्तारणे प्रभो |
अतस्त्वां सर्वभावेन प्रणतो नतवत्सल ||
मलं यत्कायजं वापि मानसं चैव केशव |
न तस्यान्योऽस्ति देवेश क्षालकः त्वामृतेऽच्युत ||
संसर्गाणि समस्तानि विहाय त्वामुपस्थितः |
संगो मेऽस्तु त्वया सार्धं आत्मलाभाय केशव ||
कष्टं आपत्सुदुष्पारं संसारं वेद्मि केशव |
तापत्रय परिक्लिष्टः तेन त्वां शरणं गतः ||
एषणाभिः जगत्सर्वं मोहितं मायया तव |
आकर्षितं च लोभाद्यैः अतः त्वां अहं आश्रितः ||
नास्ति किंचित् सुखं विष्णो संसारस्थस्य देहिनः |
यथा यथा हि यज्ञेश त्वयि चेतः प्रवर्तते ||
तथा फलविहीनं तु सुखं आत्यन्तिकं लभेत् |
नष्टो विवेकशून्योऽस्मि दृश्यते जगद् आतुरम् |
गोविन्द त्राहि संसारात् माम् उद्धर्तुं त्वमर्हसि ||
मग्नस्य मोहसलिले निरुत्तारे भवार्णवे |
उद्धर्तां पुण्डरीकाक्ष त्वामृतेऽन्यो न विद्यते ||
|| विष्णु स्तवनं सम्पूर्णम ||