कश्यप कृत गणेश कवच
 |
| कश्यप कृत गणेश कवच |
|| गौर्यवाच ||
एषोऽतिचपलो बालो दैत्यान्हन्ति बहूनपि ||
अग्रे किं कर्म कर्तेति न जाने मुनिसत्तम |
दैत्या नानाविधा दुष्टाः साधुदेवद्रुहः खलाः ||
अतोऽस्य कण्ठे किञ्चित्त्वं रक्षार्थं बद्धुमर्हसि |
|| मुनिरुवाच ||
गणेशकवचं वक्ष्ये सर्वरक्षाकरं नृणाम् |
ध्यायेत् सिंहगतं विनायकममुं दिग्बाहुमाद्ये युगे |
त्रेतायां तु मयूरवाहनममुं षड्बाहुकं सिद्धिदम् |
द्वापरे तु गजाननं युगभुजं रक्ताङ्गरागं विभुम्
तुर्ये तु द्विभुजं सिताङ्गरुचिरं सर्वार्थदं सर्वदा ||
अस्य श्री गणपतीकवचस्य मुद्गल ऋषिः अनुष्टुप् छन्दः श्री महागणपतिर्देवता आत्मर क्षार्थं पाठे विनियोगः |
विनायकः शिखां पातु परमात्मा परात्परः |
अतिसुन्दरकायस्तु मस्तकं सुमहोत्कटः ||
ललाटं काश्यपः पातु भ्रूयुगं तु महोदरः |
नयने भालचन्द्रस्तु गजास्यस्त्वोष्ठपल्लवौ ||
जिह्वां पातु गणक्रीडश्चिबुकं गिरिजासुतः |
वाचं विनायकः पातु दन्तान्रक्षतु दुर्मुखः ||
श्रवणौ पाशपाणिस्तु नासिकां चिन्तितार्थदः |
गणेशस्तु मुखं कण्ठंपातु देवो गणञ्जयः ||
स्कन्धौ पातु गजस्कन्धः स्तनौ विघ्नविनाशनः |
हृदयं गणनाथस्तु हेरम्बो जठरं महान् ||
धराधरः पातु पार्श्वंपृष्ठं विघ्नहरः शुभः |
लिङ्गं गुह्यं सदा पातु वक्रतुण्डो महाबलः ||
गणक्रीडो जानुजंधे ऊरु मंगलमूर्तिमान् |
एकदन्तो महाबुद्धिः पादौ गुल्फौ सदाऽवतु ||
क्षिप्रप्रसादनो बाहू पाणी आशाप्रपूरकः |
अङ्गुलिश्च नखान्पातु पद्महस्तोऽरिनाशनः ||
सर्वाङ्गानि मयूरेशो विश्वव्यापी सदाऽवतु |
अनुक्तमपि यत्स्थानं धूम्रकेतुः सदाऽवतु ||
आमोदस्त्वग्रतः पातु प्रमोदः पृष्ठतोऽवतु |
प्राच्यां रक्षतु बुद्धीश आग्नेय्यां सिद्धिदायकः ||
दक्षिणस्यामुमापुत्रो नैरॄत्यां तु गणेश्वरः |
प्रतीच्यां विघ्नहर्ताऽव्याद्वायव्यां गजकर्णकः ||
कौबेर्यां निधिपः पायादीशान्यामीशनन्दनः |
दिवाऽव्यादेकदन्तस्तु रात्रौ सन्ध्या सु विघ्नहृत् ||
राक्षसासुरवेतालग्रहभूतपिशाचतः |
पाशाङ्कुशधरः पातु रजः सत्त्वं तमः स्मृतिम् ||
ज्ञानं धर्मं च लक्ष्मीं च लज्जां कीर्तिं दयां कुलम् |
वपुर्धनं च धान्यं च गृहान्दारान्सुतान्सखीन् ||
सर्वायुधधरः पौत्रान्मयूरेशोऽवतात्सदा |
कपिलोऽजाविकं पातु गवाश्वं विकटोऽवतु ||
|| अथास्य फलश्रुतिः ||
भूर्जपत्रे लिखित्वेदं यः कण्ठे धारयेत्सुधीः | न भयं जायते तस्य यक्षरक्षः पिशाचतः ||
त्रिसन्ध्यं जपते यस्तु वज्रसारतनुर्भवेत् | यात्राकाले पठेद्यस्तु निर्विघ्नेन फलं लभेत् ||
युद्धकाले पठेद्यस्तु विजयं प्राप्नुयाद् ध्रुवम् | मारणोच्चाटनाकर्षस्तम्भमोहनकर्मणि ||
सप्तवारं पठेद्यस्तु दिनानामेकविंशतिम् | तत्तत्फलमवाप्नोति साधको नात्र संशयः ||
एकविंशतिवारं च पठेत्तावत् दिनानि यः | कारागृहगतं सद्यो राज्ञा वध्यं च मोचयेत् ||
राजदर्शनवेलायां पठेदेतत् त्रिवारतः | स राजानं वशं नीत्वा प्रकृतिं च सभां जयेत् ||
इदं गणेशकवचं मुद्गलेन समीरितम् | कश्यपाय च तेनाथ माण्डव्याय महर्षये ||
मह्यं स प्राह कृपया कवचं सर्वसिद्धिदम् | न देयं भक्तिहीनाय देयं श्रद्धावते शुभम् ||
सर्वरक्षाकरं सर्वमनःकामप्रपूरकम् | अनेनानस्य कृता रक्षा न बाधाऽस्य भवेत्क्वचित् ||
राक्षसासुरवेतालदैत्यदानवसंभवा | सर्वारिष्टानि नश्यन्ति कवचस्यास्य धारणात् ||
|| गणेश पुराणे गणेश कवच सम्पूर्णं ||